Cantadores de Torpè________________________Efiseddu Pau

SA NOSTALGIA DE SA PATRIA TERRA SARDA
(moda cantada in Oberhausen, Germania)

De zertu un'ateruna gai bella
chei s'isula nostra tantu cara
non b'est in totu su Mediterraniu
chi totucantos miran che istella
pro Gennargentu, Mont'Alvu e Limbara
metas de su turismu temporaniu.
Eco pruite su gridu ispontaniu
ch'essit da chie inie bi est naschidu
dolorosu pruite non resessit
a viveret inie calmu e mite.
S'ispontaniu gridu eco pruite
ch'essit da chie inie bi est naschidu
eco pruite s'ispontaniu gridu
da chie b'est naschidu inie che 'essit
dolorosu pruite non resessit
calmu e mite a viveret inie.
Ma s'isperanzia in coro at note e die
de si abreviare 'ogni distanzia
note e die in coro at s'isperanzia
dogni distanzia de si abreviare
pro che torrare e pro viver umpare
chin sa costante intera parentella.

Chin prosperosa e digna era novella
d'amore e paghe in s'intera Sardigna
pro in tota sa terra 'e su nuraghe
godan da oje in poi de 'ogni cosa.
Chin novell'era digna e prosperosa
d'amore e paghe in sa Sardigna intera
chin prosperosa, digna e novell'era
d'amore e paghe in s'intera Sardigna
chin novell'era prosperosa e digna
in s'intera Sardigna amor'e paghe
pro ch'in tota sa terra 'e su nuraghe
godan de 'ogni cosa da oje in poi
ca non si potet prus a viver goi
segregados in terra istraniera.

 

De zertu un'ateruna gai bella…
…………………………………
chin sa costante parentella intera.

Suta d'un'ateruna bandiera
pro totus creo chi sa vida est bruta
umiliante, trista e avilida,
perfida, ingrata e indigna fortuna.
De bandiera suta a un'ateruna
pro totus creo chi sa vida est bruta
d'un'ateruna bandiera suta
pro totus creo ch'est bruta sa vida
umiliante, trista e avilida,
fortuna ingrata, perfida e indigna
pro cussu pregan totus chi in Sardigna
b'apat progressu e ben'istare a prou
pro rientrare 'ognunu a gustu sou
e viver chin salude e ben'istante.

De zertu un'ateruna gai bella…
……………………………….
chin s'intera parentella costante.

Tropu mala est sa vida 'e s'emigrante
ca un'iscopu non potet ragiunghere
e li tocat chi lotet tota vida
andend'in chirch'e trivagliu a donz'ala.
Sa vida 'e s'emigrante tropu est mala
ca non potet ragiunghere un'iscopu
sa vida 'e s'emigrante est mala tropu
ca un'iscopu ragiungher non potet

e tota vida li tocat chi lotet
andende in chirca a donz'ala 'e trivagliu
ponzendesi sa vida a repentagliu
in gravosas fadigas consumendesi
a repentagliu sa vida ponzendesi
suta sa disumana gautella.
Tue Maria Pura e Verginella
sos chi son fora 'e sa nadia terra
sanos los torra a sa sarda dimora
e tranchiglia una vida lis procura.
Tue Maria Verginella e Pura
sos chi son fora 'e sa terra nadia
Tue Pura e Verginella Maria
sos chi 'e sa terra nadia son fora
sanos los torra a sa sarda dimora
e lis procura tranchiglia sa vida.
Faghelis luminosa de guida
cale mama costante premurosa
faghelis de guida luminosa
cale costante e premurosa mama.
Apaga dogn'intentu e dogni brama
a cantos sardos t'an in pensamentu
apaga dogni brama e dogni intentu
cant'aspiran de bene in coro e mente.
E a su Regionale Presidente
chin totu su Cunsizu in generale
e a su Presidente Regionale
chin su Cunsizu in generale totu
c'ana dae sos sardos tentu votu
pro rezer sa Sardigna a manu tenta,
chi sas promissas cumpran lis ammenta
ei sa zente chi non la currumpan
ammentalis chi sas promissas cumpran
e chi non la currumpana sa zente
chin sas promissas fatas vanamente

publicamente peri sas piatas
chin sas promissas vanamente fatas
ma menzus sa politica analizen
ei sos progetos chi los realizen
de Sardigna in totu sos trezetos
e chi los realizen sos progetos
in totu sos trezetos de Sardigna
ca cussa mama nostra e bostra est digna
d'esser menzus tratada e chin decoro.

Ma fino, caros frades, dae coro
preghende a totus de mi cumpatire
si in su cantare apo fatu errore
ca non so poeta 'e cumpetenzia.
Paghe e salude e bene e sorte imploro
chin prosperosu e nobbile avenire
de bontade, de fide e de amore
in dogn'ostra bramada residenzia
ei su chi adorades e adoro
bos potat de 'ogni cosa prevenire
pro ricumpensu de su 'ostru suore
in custa istraniera permanenzia.
Cagliari, Tatari, Oristani e Nuoro
dignamente bos potat agoglire
tribbutendebos meritos de onore
chin santa e digna sa riconnoschenzia.
E cando chi a Sardigna rientrades
ispero chi de me bos ammentedas
e a mi visitare bei 'enzedas
in sa 'ezzesa ca mi cunfortades,
intantu a totus adios e ciau
dae su 'ezzu Efiseddu Pau.