S'ISCOLA
(sonete)

S'iscola nobilitat sa pessone,
la moralizat e la civilizat
e si unu s'iscola contivizat
otenit tanta sodisfazione;

perfezionat sa professione,
menzus cosa non b'at chi si disizat
ca unu tantu coltu si assimizat
a su prus importante campione.

Ca l'innalzat a grados sublimados
de s'ischire umanu universale
espertu in totacantas sas materias.

Pro cussu totus chin sas mentes serias
dad'importu a s'iscopu culturale
ca boch'innalzat a ecelsos grados.

DONZI COSA A TEMPUS SOU
(sonete)

Cando chi fia ancora in zoventude
paria su prus ricu de su mundu,
ballao e mi girao tundu tundu
prosper'e forte che puddedru rude.

De fagher versos tenia virtude
e cantaia festant'e giocundu,
invezzes como so che moribundu
da cando perdid'apo sa salude.

Mancu prus gana m'enit de cantare
a boghe alta comente a prima
pensende a custa trist'amara vida,

e pro cussu ti prego 'e perdonare
si donz'olta non mando sa rima
comente cherrer dias preferida.