Cantadores de Torpè________________________Nicolinu Tarquini

 

NICOLINU TARQUINI

Fit naschidu in Torpè su 22 de nadale de su 1909 e nd'est mortu in Torpè su 28 'e jannagliu de su 1993. Sa mama, Tilipa Puzone, sich'est morta duos meses a pustis de sa naschida de Nicolinu e isse est istadu pesadu dae sa familia de su tiu Salvadore Puzone.
No aiat fatu peruna iscola e aiat imparadu a iscriere a mannu dae isse mantessi.
Operaju in sas impresas dae s'edade de seigh'annos aiat eredadu sa vena 'e sa poesia dae su babbu naturale Antoni Rimundu Iscanu de Alà connotu chin su numene de Iscanitu. Iscanitu fit pintore e aiat pintadu sas paradas de sa creja de 'idda e fit poete de palcu e cantaiat chin sos poetes mannos de su tempus.
Nicolinu no teniat boghe 'ona e mancari ischerat cantare a bolu intemes de cantare isse faghiat a naradura. E poesias nd'at nadu medas chi bi diat cherrere unu libru a banda pezzi pro sas suas. Po bona sorte nostra cando s'est bidu imbezzende at iscritu in d'unu cuadernu sas chi galu s'ammentaiat e da incue amus leadu sas cantones chi inoghe presentamus. At cantadu s'amore, sa fide, sa 'ezzesa e ateros temas de gabbale ma isse fit mastru in sa poesia satirica e a cussa si b'est dedicadu chin passione comente si ladit dae sas poesias chi sighin.