Cantadores de Torpè________________________Juanne Antoni Ispanu

LAMENTOS
Pro isse mantessi cando chi at tentu sa difortuna de s'inzegare
(otava serrada)

In sa vida unu mai non creia
a esserepo zegu diventadu!
De Siracusa o Santa Lughia
e cantas boltas bol'apo pregadu:
chi m'aerezis sa vista torradu
sana comente a prima la tenia.
Ca a esser zegu est sa peus cosa
sa die prus bella pro me est oscurosa.

Penso chi non so tantu pecadore
a mi dare sa sorte a su contrariu
ca sende mannu e zovanu minore
fia semper cunfrade 'e su Rosariu;
andao a creja a sa missa mazore
devotu de pregare necessariu:
fia cunfrade e postu de cordone
e faghia sa Santa Comunione.

O Deus Soberanu Onnipotente,
chi che sezis in s'Altu Paradisu
e paret chi bos bida a oju in visu
comente cando bos tenza presente!
Torrademi sa vista de improvisu
pro 'idere 'ogni anzenu, 'ogni parente
ca vois sa potenzia la tenides
e si cherides fagher lu potides.

Pro non mi learene a manu a manu
calch'iscuta a passizu in sa carrera
Deus meu faghide sa manera
de miche learezis cras manzanu
o si nono lassadelu a su sera!
Ma ite fago goi pagu sanu?
Si trunchet custa vida ca est penosa:
jughidemiche a umbe nd'est s'isposa!