LOGUDORO
(sonete)

Istanote ap'intesu Logudoro
chi fit sa 'idda mea visitende,
non violinos, ne chitarras d'oro
jighiat e ne mandolas sonende.

S'alma gentile, su nobile coro
de Ichnusa bella fit mustrende,
nende: in altu, in alt'o Nuoro
o Tatari, o Casteddu, ite pensende

sezis in custu tempus de dolore
in custos annos de disdicia pienos,
ajò fiera sa fronte drizzade!

Amade in Cristos, fortemente amade
si diventare cherides amenos
jardinos pro s'italicu onore.

PRO SAS TERACAS SARDAS IN ROMA IN SU CUNVEGNU ACLISTA
(sonete)

In custa ocasione, sorres caras
ite bos at a narrer su meu coro?
E ite a bois chi tantu onoro
esprimer dene totu custas laras?

Che in su firmamentu istellas jaras
siedas in sa fama, in su decoro,
ricas de onestade, almu tesoro,
sa menzus perla fra sas perlas raras.

Umiles fizas de sa sarda terra
umbe dignu tenzeit naschimentu
sa grande d'Arborea Eleonora,

in sa citade eterna bois ancora
acesa cunservade 'ogni momentu
sa Fide triunfadora de 'ogni gherra..

Augurios bellos, novidades bonas,
saludos tantos, Pepinu Coronas.