Cantadores de Torpè______________________Antoni Maria Pala

 

LAMENTOS DE UNA ZOVANA
(otava serrada)

Sola senza cunfortu e senz'amparu
so restada che frunza in mesu campu,
prite cantu tenia de pius caru
isparidu miss'est che unu lampu,
brivada de cunfortu e de riparu
senza b'aer rimediu ne iscampu,
pianghende de coro tota vida
sas culpas de sa sorte incrudelida.

Sas culpas de sa sorte traitora
piango not'e die amaramente
ca so restada ispoza de sa zente
chi m'aiat culladu in sa prim'ora,
oje de babbu e mama nde so fora
ca sa sorte at ziradu a diferente
restendemi s'ammentu solu ebbia
de sos recreos de sa pizzinnia.

De sos dulches recreos de s'infanzia
m'est restadu unu sonniu isvanidu,
pesada in d'unu mare de bundanzia,
rica de donzi afetu inteneridu,
circundada de parentes de costanzia
chi mai poto ponnere in olvidu,
oje resto isolada e senza gosu
atraessende unu tempus penosu.

Oramai sos annos son passados
chi pro me fin diletu e cuntentesa,
pro me fin 'eranos profumados
sos chi passao tando, ite bellesa,
vida ispensierada e senza ofesa
chin totu sos disizos apagados,
donzi die su sole a prim'essida
mi regalait una menzus vida.

Tando no mi curao si vivia
coment'a oje in d'una frazione
ca reina assoluta mi paria
de sa prus importante nazione:
Roma, Londra, fin nudda in paragone
de sos afetos de sa familia
chi nos cuncambiaiamus continu
dae su chi nos palpitat in sinu.

Ite menzus delizia e cuntentu
si potet olobrare in custa vida
de cando sa famiglia tot'unida
vivet senza disturbu e pensamentu?
e de cussa delizia nodida
fia possedidora 'onzi momentu
finzas a cando sa sorte contraria
m'at obligadu a viver solitaria.