Cantadores de Torpè______________________Antoni Maria Pala


ANTONI MARIA PALA

Naschidu in Torpè su 13 'e cabidanni de su 1903 e mortu in Torpè su 22 de martu de su 1976. At frecuentadu finzas a sa terza elementare e at leadu sa lissenza elementare comente privatista a s'edade de 55 annos pro poter faghere s'iscrutadore in tempus de votaziones. Creschidu in d'una familia de massajos in zoventura at fatu su massaju comente teracu anzenu. In su 1926 est emigradu comente "bracciante agricolo" in Continente a Maccarese umbe at trivagliadu comente istagionale. Ghiradu a bidda at trivagliadu in sas bonificas de su riu e in su fraigu de sos argines. Poscas de aer trivagliadu in sas minieras de Monte Bezzu (1946) at coladu unu periudu de disocupazione, finzas a cando est intradu a trivagliare in sos cantieris forestales de sos pinos in su 1952. At cuminzadu a cantare in poesia dae sende criatura ponzende cantoneddas po jogu. Apassionadu de s'arte de sa poesia at sighidu a la contivizare imparende siat a cantare a bolu siat a ponner cantones a taulinu. At semper cantadu in pratas e zilleris cunfrontendesi finzas chin sos poetes mannos chi cantaian in sa zona, sa malasorte de non tenner boghe 'ona l'at brivadu de cuminzare sa carriera de poete de palcu mancari nde tenzeret sas calidades. Impegnadu in politica fit atentu a sos temas soziales in sos cales bogait a campu totu sa vena sua e s'arte poetica. Est istadu premiadu in su cuncursu "I poeti sardi contro la Legge truffa", bandidu dae su Partidu Comunista in su 1953, presentende su sonete "Sa leze trufa". Mancari no aperet istudiadu s'aiat fatu una cultura personale lezende libros de istoria e romanzos (Tolstoj, Grazia Deledda ecc..) chi li daiat su frade Luisi chi fit Mastru 'e iscola. Calculadu in bidda comente unu de sos menzus poetes, fit unu perfezionista de sa metrica e de sa rima de sa cale fit mere e ischiat ponner finzas modas e modellos. Fit istimadu in totu s'Alta Baronia e calchi 'olta beniat chircadu po ponner cantones in numenes de ateres: po unu babbu ch'at perdidu su fizu in sa gherra, po una zovana difortunada e ateras gai. Sas poesias chi presentamus sono istadas goglidas dae ziu Efiseddu Pau chi li fit amigu e chi lu contaiat comente unu Mastru.