Cantadores de Torpè____________________________Carulinu Nonnis

A SA MUZERE
(undighina)

Cale sole lughente,
cale anghelu divinu
cale coro perfetu est su chi adoro.
T'apo semper in mente,
e t'istimo continu
po te sola mi palpitat su coro
ca su amare a tie
faghet felice a mie,
non t'ismentigo mai palma de oro,
t'amo semper costante
chin vera passione de amante.

Semper sigo a t'amare,
non t'ismentigo cree
ca tropu forte est s'istimassione.
Si poderes pensare
su chi sufro po te
dias tenner de me cumpassione
ca custos ojos mios
de lagrimas a rios
m'infunden totu canta sa pessone
si non biden a tie
'ogni ora, 'ogn'istante de su die.

S'amare impetuosu
m'infundet in su coro
forza, corazu, isperanza e afetu.
Pro me non b'at riposu
si non t'ido tesoro
donzi cosa mi rendet inchietu,
puite a durare
si no est po gosare
sa chi po me est d'amore sugetu,
ormai so risoltu
o 'alanzare a tie o jeo moltu.

Donzunu sind'amorat
de sa rosa incantada
cando fissat sos ojos rie rie,
no nd'at naschidu ancora
gai bene formada
de carnagione bianca che nie.
Non s'agatat pintore
de aer su valore
de pintare una dea che a tie,
no s'agatat pinzellu
chi adornat su tou modu bellu.

S'amare pazzamente
a tie rosa dechida
mi ponet custu coro in disilviu.
T'ap'a tenner presente
po cantu 'isto in vida
finzas chi dao a su mundu s'adiu.
E pustis chi so moltu
suta terra sepoltu
ischeletro ridotu senza briu
m'ap'a ammentare 'e te
ca s'oget'e su coro est in Torpè.

Ses bella e delicada ogetu raru
verginella incoronada de laru.

Ogetu raru ses bella e delicada
de laru verginella incoronada.

Ogetu raru ses delicada e bella
de laru incoronada verginella.