O cara e fida prus de unu mese
fio o donosa senza ti mirare
sos suspiros ti mando a umbe sese
si currisposta mi podes torrare
ca sos lamentos meos non los crese
ello chie mi potet discansare?
mandami ca t'imbio sos suspiros
a umbe fago abbitos e ritiros.
A umbe fago abbitu ritiradu
dae sa cara tua delicada
mandami sos suspiros coro amadu
si de me non nde ses ismentigada
ca apenas mi resistit su fiadu
sos suspiros mi dan s'alienada
cando sa cara tua det mancare
de piantu mi devo consumare.
Dae cando chi prus non t'apo 'idu
ahi! de mene ite contu bi leo?
No mi proigat manigu e nè bidu
de suspirare un'ora no arreo.
Benz'a nde perderepo su sentidu
d'istare sanu in cherveddos non creo
ca jeo so sufrende tantas penas
si tue chin suspiros no mi allenas.
